Shaip Kamberi bojkoton Kuvendin e Serbisë: Protestë kundër diskriminimit sistematik ndaj shqiptarëve

Shaip Kamberi, i vetmi deputet shqiptar në Kuvendin e Serbisë, ka njoftuar të martën se do të bojkotojë punimet e Parlamentit serb, në shenjë proteste ndaj, siç tha ai, krizës politike dhe institucionale në vend dhe diskriminimit të vazhdueshëm ndaj shqiptarëve në Luginën e Preshevës.

Përmes një njoftimi në Facebook, Kamberi deklaroi se në rrethana të tilla nuk do të marrë pjesë në seancat e ardhshme parlamentare, duke theksuar se “shoqëria e vërtetë proevropiane ndërtohet vetëm mbi barazi dhe dinjitet për të gjithë – përfshirë shqiptarët”.

Ai vlerësoi se një Serbi demokratike nuk mund të ndërtohet mbi “mitet e së kaluarës, trillimet historike dhe ambiciet hegjemoniste në Ballkanin Perëndimor”.

Ky vendim i Kamberit vjen vetëm dy ditë pas protestave masive antiqeveritare në Serbi, të cilat janë shoqëruar me përleshje me policinë dhe arrestime, përfshirë edhe 29 studentë të akuzuar për bllokada dhe kundërshtim të dhunshëm të autoriteteve. Studentët kanë akuzuar policinë për përdorim të tepruar të forcës.

Deputeti shqiptar theksoi se bojkotin e ndërmerr gjithashtu duke pasur bindjen se demokratizimi i Serbisë “nuk është çështje e ndërrimit të pushtetit, por kërkon vullnet të sinqertë për reforma, respekt për qytetarët dhe trajtim të barabartë për të gjitha komunitetet”.

Ai shtoi se është dëshmitar i përditshëm i shkeljeve të të drejtave themelore të shqiptarëve në jug të Serbisë, duke përmendur konkretisht mosnjohjen e diplomave të Kosovës, nënpërfaqësimin politik e institucional, pasivizimin administrativ dhe mungesën e perspektivës ekonomike në Luginën e Preshevës.

“Pasivizimi i adresave është kthyer në një mjet sistematik për shpopullimin e Luginës nga shqiptarët”, theksoi Kamberi, duke iu referuar praktikës përmes së cilës qytetarët fshihen nga regjistrat civilë nëse autoritetet vlerësojnë se nuk jetojnë më në adresat e deklaruara – gjë që çon në humbjen e shtetësisë dhe të të drejtave themelore, përfshirë të drejtën për të votuar, punuar apo pasur qasje në kujdes shëndetësor.

Në Serbi jetojnë mbi 60 mijë shqiptarë, të cilët përbëjnë pakicën e katërt më të madhe në vend, sipas regjistrimit të vitit 2022. Rajoni i Luginës së Preshevës – që përfshin komunat Preshevë, Medvegjë dhe Bujanoc – vazhdon të jetë një nga zonat më të margjinalizuara në vend dhe, sipas vëzhguesve ndërkombëtarë, merr vëmendje institucionale vetëm gjatë fushatave zgjedhore.

Shaip Kamberi nuk ka sqaruar për sa kohë do ta zgjasë bojkotin e tij, por ka paralajmëruar se do të informojë publikun në kohë për hapat e ardhshëm politikë.